Tante Mien so umur, jadi de pe mata so sadiki rusak. Kalo ja lia orang so ja babayang. Jadi suatu hari tante Mien pigi di toko kacamata.
Penjaga Toko: Selamat Siang Tante, cari kacamata?
Tante Mien: Iyo
Penjaga Toko: So pernah pake kacamata tanta?
Tante Mien: Oooh blum, baru pertama ini
Penjaga Toko: Kalu baru pertama, coba maso diruangan itu, kita mo periksa dulu tu mata…
Kong dong dua maso ditampa periksa mata…
Penjaga Toko: Tanta huruf apa ini? (batunjung huruf yang kacili)
Tante Mien: Nintau…
Penjaga Toko: Kalau ini dang Tanta? (batunjung huruf yang lebe besar)
Tante Mien: Kita nintau lei itu…
Penjaga Toko: Kalau ini dang Tanta? (batunjung huruf yang paling besar)
Tante Mien: Sama, itu lei kita nintau…
Penjaga Toko: Adooee tanta, so paling besar komang ini, masa masih nda dapa lia?
Tante Mien: Dapa lia kwa itu Cewe, maar tanta kwa nintau babaca…co ngana setunjung yang laeng…
Amper satu Indonesia dapa virus mati lampu. PLN rupa hobi semati lampu, nda terkecuali di Utu pe kampung, Utu so grel lantaran de pe TV ada rusak karena nih mati lampu-mati lampu. Kong Utu ba telepon pa PLN mo ba klak.
Utu: Pak, kiapa ni lampu mati-mati terus, so rusak ta pe TV satu. Ngoni kira murah tu TV itu? Ngoni mo ganti itu?
Petugas: Maaf pak salah sambung.
Utu: Bukang cuman TV, kita pe lampu so berapa yang nda mo manyala, kulkas amper lewat. Ngoni kira tu doi ja jatung dari langit mo beli tu barang-barang…
Petugas: Maaf pak salah sambung, ini bukan PLN, ini PELNI pak…
(Oooppss Utu ta kage, so batoreba salah sambung lei…)
Utu: Iyo, sama lei ngoni, beli tiket jam 4 baru berangkat jam 10 malam …
Utu ada kirim de pe anak Ance kuliah di Bandung…ada kuliah di salah satu institut terkenal disana.
Suatu hari so mo maso semester baru, Ance kirim surat pa dia pe papa, biasa, mo minta doi for mo bayar tuh uang semester. Utu, papa yang bae, pe dengar for bayar Ance pe kuliah, dia iko kirim tu doi, transfer BCA, iko sampe tu doi.
De pe esok, Ance ada talupa tu uang praktek, so nda kirim surat, dia iko telpon de pe papa. Seperti biasa, Utu iko capat2 kirim tu doi…
De pe hari berikut lei, Ance so batelepon pagi-pagi karena dia dapa inga blum bayar doi kost. Utu, so pastiu tiap hari dapa minta kirim doi, so sadiki curiga pa de pe anak. Apalagi dia nda tau apa itu kost. Kong Utu bage: “Bae-bae ngana disana Ance, jang ta salah bergaul, kalo kuliah ya kuliah ngana, jang kuliah kost kuliah kost …”
Cerita ini diambil dari wall facebook SMOKOL.com, ditulis oleh Bryan Kho. Maar inga bae-bae ini cuman joke, nda stou terjadi disalah satu rumah makan atau hotel di manado. :))
Ungke kata kerja di rumah makan. Satu kali dia pe Bos pangge mangada.
Bos : "Ungke, kita somo pecat jo pa ngana ne."
Ungke : "Ado, kyapa bos? Apa kasiang ta pe salah?"
Bos : "Bagimana kwa ngana, tiap kali kerja, tu kore2 gigi (tusuk gigi) cuma ja abis pa ngana. Lama2 rugi kita."
Ungke : "Ih bukang kita ja se abis itu. Bos pe anak yang ja pake banyak2. Kita abis pake, kita taruh ulang pa depe tampa..."
Utu pe Mama mo beking gohu, maar masih kurang popaya. Kong dia suru Utu pete Oom No, dorang pe birman, pe popaya.
Kong Utu pigi no pa Oom No pe kintal belakang kong so mulai cungkel tu popaya. Da sementara ba cungkel kong Oom No dapa riki...
Oom No: HEII UTU, da ba apa ngana? bapancuri popaya ngana?
Utu: Nda Oom, cuman da mo ambe falinggir (layang-layang)...
Oom No: Ngana mo beking apa tu falinggir..?
Utu: Mo beking gohu...
Sekarang so mulai maso musim durian. Jadi so mulai ada berdatangan ni tukang-tukang bajual durian. Utu so janji pa depe anak mo beli akang durian, jadi dia bacari ni durian, kong so mulai batawar...
Utu: Nyong, berapa dang ni durian satu?
Nyong: Tu dia 30ribu
Utu: Oda tele, pe mahal sekali komang...kiapa do pe mahal?
Nyong: Manis-manis ini Oom...jadi mo ambe berapa?
Utu: talalu mahal, pe kanintong (kacili) lei...
Nyong: kanintong kanintong...coba Oom talang enteru tu durian kanintong kalo bole...
Hari minggu pagi, Pendeta bersemangat sampe kadang2 bataria ba-khotbah dimuka jemaat..
Pendeta: ...di Dunia ini, kita CUMANG TAKO PA TUHAN...
Pas, Pendeta ada bilang itu, kage Bu, preman kampung muncul dimuka pintu, rupa baru abis minum dia...
Bu: KONG KITA DANG?
Lantaran takage deng so tako, kage Pendeta reflek ba jawab...
Pendeta: Deng ngana lei no, jadi dua kasiang tu kita tako...
