Humor Manado: Beking KTP

Oom Utu pe KTP so abis depe masa berlaku, so musti perpanjang, beking KTP baru. Pagi-pagi Oom Utu so pigi ka kantor Kuntua, maar pe soe le, sampe disana Kuntua blum datang, cuma ada pegawai.

Oom Utu: Selamat Pagi, Kuntua ada?

Pegawai: Blum datang Oom Utu, mo ada perlu apa so?

Oom Utu: Napa kwa kita mo beking KTP, so mati ta punya...

Pegawai: Ooo musti perpanjang dang itu...Maar kita le nintau Kuntua mo datang ka nyanda hari ini...bagini jo, Oom Utu setinggal jo Oom Utu pe nama, kong tinggal mo ambe besok.

Oom Utu: Ooo, so seno stou ngana kang?

Pegawai: Kiapa so seno do Oom?

Oom Utu: Kalu kita setinggal kita pe nama di sini...nanti kita pulang dang pake nama apa?

Gunung Klabat

Gunung Klabat adalah gunung yang sangat populer dan menjadi gunung kebanggaan orang Manado. Gunung yang terletak didaerah Tonsea ini adalah gunung tertinggi di Sulawesi Utara. Gunung ini memiliki ketinggian 2100 meter diatas permukaan laut. Gunung ini adalah gunung berapi yang (mungkin) sudah tidak aktif lagi.

Gunung ini juga mungkin salah satu alasan mengapa daerah sekelilingnya, daerah Tonsea, menjadi daerah yang sangat subur. Pohon kelapa tumbuh subur, sawah padi dan masih banyak lagi.

Ada beberapa jalur untuk mendaki gunung ini, salah satunya adalah dari Airmadidi.

Nama klabat sendiri sekarang menjadi nama stadion paling besar di Manado dan juga menjadi nama satu universitas swasta besar yang terletak dikaki gunung ini.

Humor Manado: Darah Ungke

Ungke pe tamang bae da saki kras, butuh transfusi darah, sementara di rumah saki tu persediaan dara so kosong. Jadi dokter mo cari dari keluarga dan teman.

Dokter: Ungke, ngana pe darah apa dang?

Ungke: Ado, malo kita mo bilang dok

Dokter: Kiapa malo mo bilang?

Ungke: Butul ini dok, malo kasiang mo bilang...

Dokter: Ngana musti bilang Ungke, ngana pa tamang ini butuh darah, kita musti tau ngana pe darah apa?

Ungke: Malo kasiang mo bilang, maar voor Utu, kita pe tamang bae, apa boleh buat...kita kwa DARAH SANGER dok...

Humor Manado: Ada apa di Teling

Utu ada batunggu mikro di stasion pagi-pagi, muka sadiki merah baru da bage cap tikus kwa dia...

Sopir (bataria cari cari penumpang): TELIIINGG...TELIINGG...

Kage Utu datang kong kore tu Sopir...

Utu: Ada apa so di Teling?

Humor Manado: Manyanyi di Radio

Utu ini so terkenal suka sekali manyanyi...Maar so terkenal lei ni Utu kalo manyanyi fals sekali, nintau nada sama sekali dia...

Satu hari, Utu da dudu di teras rumah kong so mulai manyanyi dia...Kage tante Mientje, depe birman yang so pastiu dengar-dengar ni Utu datang "bapuji".

Tante Mientje: Odoo Utu, coba kwa ngana ini da manyanyi di radio...

Utu (senang sekali da dengar itu): Ooo terima kasih tante Mien, jadi menurut tante Mien kita pe suara so bole maso di radio kang?

Tante Mientje: Iyo manyanyi kwa di radio, biar bole mo semati tu radio...

Humor Manado: Pancuri Mangga

Satu hari, Utu, Oom Ance pe anak da dapa riki da diatas Oom Evert pe pohon mangga.

Oom Evert: UTUUU...ba pancuri mangga ngana kang? turun sini ngana...

Utu: Ndaa kwa Oom Evert...kita kwa cumang da dudu disini, cari angin...

Oom Evert: Ooo jang putar bale banya alasan ngana...turun ngana, ta mo bawa pulang pa ngana pe papa biar dia tau depe anak pancuri mangga...

Utu: Parcuma Oom, ta pe papa nda ada dirumah...

Oom Evert: Jang batowo ngana...ngana tau darimana ngana pe papa nda dirumah...sini ngana Oom nda percaya pa ngana...

Utu: Adoo Oom, nda batowo kita...co Oom Evert pi lia di pohon mangga diujung sana, ada disitu ta pe Papa...

Humor Manado: Opa deng Babi

Diambil dari www.brvolution.com


Ada suatu cerita tentang ni satu Opa yang suka sekali makang Babi. Tu depe suka dang, ni Opa pe menu hari-hari musti ada babi. Susah sekali dang Opa mo makang kalau nda ada Babi.

Eh satu hari, Opa takancing, dapa stroke ringan karena Opa pe darah tinggi kumat. Kong Oma langsung no bawa Opa pi di Dokter. Kebetulan le Dokter pe tampa praktek nda jao, masih satu kompleks.

Abis periksa, Dokter bilang pa Opa, "Opa, opa musti brenti makang tu Babi, kalau nda Opa nda mo bae-bae dari nih saki, ada kemungkinan le Opa mo putus (meninggal.."

Oda tele, pe tako Opa da dengar tu Dokter pe kata-kata, kong Opa balas batanya, "Jadi apa dang Dok tu bole kita makang?"

Dokter bajawab, "Opa brenti dulu makang daging, makang jo yang hidop di aer..". Dokter kase resep, kong suru Opa bale ulang minggu depan for kontrol.

Akhirnya Opa deng Oma abis ambe resep iko trus pulang.

So satu minggu lewat, Dokter da tunggu-tunggu for kontrol, maar Opa nda datang-datang. Dokter pe dalam hati batanya, apa Opa so bae atau jangang-jangang le Opa so "lewat".

Jadi Dokter, pura-pura lewat sore-sore di muka rumah pa Opa, mo bacek, maar cuma ja lia pa Oma yang ja basapu kintal. So dua hari berturut-turut Dokter ja cek, maar nda pernah dapa lia pa Opa. Akhirnya hari ketiga, so nda tahan, Dokter basingga, ba basa-basi deng Oma.

Dokter : "Selamat Sore Oma.."
Oma : "Sore Dokter..dari mana dang ini?"
Dokter : "Ooh nda dari mana-mana, cuma ba-bajalang, dapa lia pa Oma jadi basingga no rabu-rabu..Bagaimana dang Opa pe kabar, ada bae-bae jo?"
Oma : "Iyo no Dok, so bae-bae sekarang kasiang Opa, so brenti dia makang babi. Sekarang dia ja makang mujaer jo deng cakalang, seperti yang Dok da suru no, makang tu yang di aer."

Dokter: "Oo mantap dang kalau bagitu, kong mana dang Opa, kyapa kita nda jaga lia kalo sore-sore do?"

Oma : "Ooo Opa da sibuk dia di belakang, so satu minggu ini Opa jaga ajar tu Babi batobo.."

Humor Manado: Papa ada dirumah

Sore-sore Utu da bermaeng kanikir, kong ada ini Oom-Oom parlente datang, rupa mo bajual asuransi dang...

Oom: Nyong kacili, siapa ngana pe nama?

Utu: Utu Oom...

Oom: Utu pe Papa ada dirumah?

Utu: Ada Oom...

Kong Utu terus bermaeng, nih Oom pi dimuka rumah kong se babunyi tu bel...so lama, nda ada yang buka, kong ni Oom bale ulang pa Utu yang masih bermaeng.

Oom: Utu, ngana bilang ngana pe Papa ada dirumah...

Utu: Iyo Oom...

Oom: Oom so bel-bel nda ada yang buka pintu..

Utu: Papa ada dirumah, maar kita pe rumah bukang disini..dimuka kuntua pe rumah, disana...kita cuman bermaeng disini...

Humor Manado: Beli Paku

Ini salah satu humor manado yang paling sering orang cerita...Nih cerita populer karena memang da selia no tu orang manado pe bajawab yang kadang memang sadiki kurang ajar maar lucu kalu mo dengar...bagini de pe cerita:


Ance ada dapa suru pi bli paku. Sampe di toko, Ance ba tanya pa Ko yang bajaga..,

Ance: Ko, mo bli paku satu kilo jo...

Ko: Mo bungkus?

Ance: Nda, mo makang disini...

Humor Manado: Pesan makang di restoran

Oom Utu so lapar kong dia maso di suatu restoran.

Utu: Kita mo pesan, satu ikang ayam rica, satu nasi deng satu eis kacang...

Pelayan: Itu jo Oom?

Utu (nintau ta sambar apa stou): Kiapa so, kurang so itu, ngana kira kita nda ada doi mo pesan lebe banya...iyo? banya doi kita ini, baru pete cingke kita...

LAGU: Papa Kase Tinggal

Napa dia, satu lei orang Manado pe lagu favorit...

Video Klip dibawah ini diambil dari Youtube, account name: baguiousa



Brapa puluh taong lalu
Kita masih kacili
Mama masih polo-polo
Papa so kase tinggal

Kita manangis satu malam
Dapa inga pa papa
Mama kurang buju-buju
Sapu-sapu di kapala

Sekarang torang so basar
So tau mancari
Mama so lebe sanang
Mama kita sayang

Sekarang Papa mo bale
Mama so nimau
Papa kurang murung-murung
Nintau mo beking apa

Humor Manado: Nae Kereta

Utu deng Ance da pasiar di Jakarta. Kong karena so di Jakarta, satu kali jo pi Bandung. Kong dong pigi di Gambir, mo nae kereta ke Bandung. Ini pertama kali dorang dua mo nae kereta. Bli tiket kong dong so nae di kereta, kurang mo tunggu kereta berangkat.

Utu: Ance, so bajalang kang ni kereta...

Ance: Babadiang ngana, jang dorang tau torang baru pertama kali nae ni kereta..

Utu: Odo so bajalang plang-plang kang ni kereta...?

Ance: Utu, ngana dengar itu, rupa nyanda butul depe ban..bababunyi bagitu do..

Utu: Kita pi lia dulu ne...rupa aneh ini...

Kage nda lama, Utu so balari pi pa Ance, depe muka so pucat..

Ance: Kiapa ngana Utu?

Utu: Adooo Ance, marijo capat, torang musti kaluar dari ni kereta...so bajalang maar so tinggal depe velek...

Humor Manado: Amin

Mientje ada kaweng deng orang Jawa, Bambang, kong dapa anak dong kase nama Amin. Nih Amin besar di Watudambo. Batamang dia deng Utu.

Amin deng Utu ini mo pancuri popaya, di belakang gereja. Kong dong so ator siasat, dong tau kalo hari minggu jam-jam setengah 10, pasti sepi karena orang da maso gereja.

Amin: Utu, kita yang nae, ngana jaga ne, lia2..kalo ada orang na sekode pa kita...

Amin so mulai nae, depe tangan so pete satu tu popaya kong tiba-tiba ada suara keras "AMIIINN". Suara pendeta kote abis doa syafaat. Ni pendeta pe Amin memang karas apalagi da pake mike pengeras suara.

Pe dengar itu, Amin so tako...apalagi dia lia Utu so cakar lari...

Kong Amin langsung bataria panjang...

"DENG UTUUU katuuu"

Humor Manado: Lebe Bae Piara Bebek

Hari minggu siang di Tondano, Utu da santai2 bauni TV diruang tenga kong de pe Papa bataria...

Papa: UTUUU...kamari ngana, bli akang roko voor Papa...ngana ambe tu doi pa ngana pe mama pe dompet...

Utu stel pongo.

Papa: UTUUU..ngana da dengar Papa da bilang tadi...bli roko dulu ngana...

Utu (akhirnya manyao): Da bauni Pa...

Papa: UTUUU...Papa bilang sekarang, sana ngana bli roko voor Papa...

Utu: Nanti jo Pa, basore le sadiki, panas diluar..

Papa: Ooo pe soe le ni anak, lebe bae Papa piara bebek daripada piara pa ngana...

Utu: Iyo, piara jo Bebek, kong suru bli roko...

Humor Manado: Bajual di Pasar

Tanta Mien ada bajual di pasar Airmadidi...Maar so 1 jam lebe da bajual nda ada orang balia depe tampa. So bapangge orang nda balia, so ator serapi, tetap orang nda balia.

Kage, so fugado stou, tanta Mien bataria: TOLOOOONNGG..TOLLOOONGG...

Orang-orang di pasar, nda rekeng tiga, iko takumpul dimuka pa tanta Mien pe tampa...

Orang-orang: Ada apa tanta? ada apa?

Tante Mien: Ooo, napa ada rica, tomat baru pete, goraka...

Humor Manado: Teh Panas

Oom Utu ada dapa rejeki, kong pasiar dia pi Jakarta. So lalah baron-ron, Oom Utu maso disatu warong. Dia lia papan menu ada jual Teh Panas 2000, teh dingin 3000.

Oom Utu (balogat): Nona, aku minta Teh Panas dang satu...

Nda berapa lama, tuh pelayan bawa Oom Utu pe pesanan...Blum riki lapas di meja, Oom Utu iko sambar tu Teh Panas...

Pelayan: Pelan-pelan minumnya Oom, masih panas teh-nya...

Oom Utu: Iyo, aku so tau masih panas...(sambil terus berusaha capat-capat mo minum se abis tu Teh)

Pelayan: tunggu dingin dulu, nanti lidahnya terbakar Oom...

Oom Utu (masih balogat): Ooo, jangan kira aku ini bodok, nanti kalo so dingin aku ngana minta bayar 3000...

Humor Manado: Anak Pertama?

Ance so pucat, tenga malam bagini depe bini, Mience so mo melahirkan. Maklum anak pertama, jadi masi kaku-kaku dia. Ada ta bingo-bingo, dia batelepon ruma saki bersalin...

Suster: Selamat malam, ada yang bisa kami bantu?

Ance: Suster, bahaya, emergency ini, tolong kirim akang ambulans kamari, napa ta pe bini so mo melahirkan...capat ne...so mo kaluar ini...

Suster: Bapak tenang dulu, ambulans akan segera kami kirimkan...Apa ini anak pertama?

Ance (masih bingo): Bukang, bukang...kita...depe laki.

Humor Manado: Doi frag

Oom Utu ada nae Mikro, doi di popoji cumang 1500. Sedangkan doi frag 1750. Pas sampe ditujuan, Oom Utu kase no tu doi frag pa sopir.

Sopir: Oom, kurang 250 ini...

Oom Utu: Ado bagimana kang, so kurang itu kasiang ta pe doi...

Sopir: Yah, bagimana Oom, maar kurang ini, torang le disini mancari...

Oom Utu: Ngana pilih jo dang, na ambe tu doi, persoalan klar ato kita nae ulang kong ngana semundur akang seharga tu 250 pera...

Humor Manado: Pongo

Hari minggu sore, Kale pigi pa Oom Utu pe warong, mo cari roko dia..

Kale: Oom Utu, mo bli roko…

Oom Utu acuh sambil ba ator depe warong…

Kale so sadiki bataria: Oom Utu…mo bli roko…

Oom Utu masih acuh…

Kale so ba grel, bataria: OOM UTU….MO BLI ROKO….

Oom Utu takage kong manyao deng bamarah: Eh Kale, bae-bae sadiki ngana, baku hormat deng orang tua…Ngana kira kita pongo so? Brapa liter minya so ngana mo bli?

LAGU: Balada Pelaut

Lagu ini yang paling sering dinyanyikan sehabis acara-acara di Manado. Bole dibilang ni lagu, lagu wajib kalau ditodong manyanyi.


Video Klip diambil dari youtube, account name: goeling





Siapa bilang pelaut mata keranjang
Kapal bastom lapas tali lapas cinta
Siapa bilang pelaut pamba tunangan
Jangan percaya mulut rica rica


So berlayar sampai so ka ujung dunia
Banyak doi baroyal habis parcuma
Dorang bilang pelaut obral cinta
Dompet so kosong baru inga rumah


Mana jo ngana pe sumpah
Mana jo ngana pe cinta
So samua kita pe punya
ngana so minta


Kita bale ngana so laeng
Kita bale ngana so kaweng
Cikar kanan vaya kondius
cari laeng