Humor Manado: Tusuk Gigi

Cerita ini diambil dari wall facebook SMOKOL.com, ditulis oleh Bryan Kho. Maar inga bae-bae ini cuman joke, nda stou terjadi disalah satu rumah makan atau hotel di manado. :))

Ungke kata kerja di rumah makan. Satu kali dia pe Bos pangge mangada.

Bos : "Ungke, kita somo pecat jo pa ngana ne."

Ungke : "Ado, kyapa bos? Apa kasiang ta pe salah?"

Bos : "Bagimana kwa ngana, tiap kali kerja, tu kore2 gigi (tusuk gigi) cuma ja abis pa ngana. Lama2 rugi kita."

Ungke : "Ih bukang kita ja se abis itu. Bos pe anak yang ja pake banyak2. Kita abis pake, kita taruh ulang pa depe tampa..."

Humor Manado: Pancuri Popaya

Utu pe Mama mo beking gohu, maar masih kurang popaya. Kong dia suru Utu pete Oom No, dorang pe birman, pe popaya.

Kong Utu pigi no pa Oom No pe kintal belakang kong so mulai cungkel tu popaya. Da sementara ba cungkel kong Oom No dapa riki...

Oom No: HEII UTU, da ba apa ngana? bapancuri popaya ngana?

Utu: Nda Oom, cuman da mo ambe falinggir (layang-layang)...

Oom No: Ngana mo beking apa tu falinggir..?

Utu: Mo beking gohu...

Humor Manado: Durian kanintong...

Sekarang so mulai maso musim durian. Jadi so mulai ada berdatangan ni tukang-tukang bajual durian. Utu so janji pa depe anak mo beli akang durian, jadi dia bacari ni durian, kong so mulai batawar...

Utu: Nyong, berapa dang ni durian satu?

Nyong: Tu dia 30ribu

Utu: Oda tele, pe mahal sekali komang...kiapa do pe mahal?

Nyong: Manis-manis ini Oom...jadi mo ambe berapa?

Utu: talalu mahal, pe kanintong (kacili) lei...

Nyong: kanintong kanintong...coba Oom talang enteru tu durian kanintong kalo bole...

Humor Pendeta: Cuman tako pa Tuhan...

Hari minggu pagi, Pendeta bersemangat sampe kadang2 bataria ba-khotbah dimuka jemaat..

Pendeta: ...di Dunia ini, kita CUMANG TAKO PA TUHAN...

Pas, Pendeta ada bilang itu, kage Bu, preman kampung muncul dimuka pintu, rupa baru abis minum dia...

Bu: KONG KITA DANG?

Lantaran takage deng so tako, kage Pendeta reflek ba jawab...

Pendeta: Deng ngana lei no, jadi dua kasiang tu kita tako...

Humor Pendeta: Janganlah mabuk oleh Anggur

Pak Pendeta ada dapa riki Utu ada minum minuman keras..

Pendeta: Utu, Efesus 5:18 Janganlah kamu mabuk oleh anggur, karena anggur menimbulkan hawa nafsu..

Utu: Ooo kita kwa nda minum anggor pak Pendeta...

Pendeta: Itu dang tu pa ngana pe tangan apa itu?

Utu: Ini cap tikus pak Pendeta, bukang anggor...

Humor Manado: Anjing Pintar

Cerita dibawah ini diambil dari wall facebook SMOKOL.com, ditulis oleh Denny Granmil Torondek.

Satu kali ini Oom Pedi mo pigi berkunjung pa dia pe tamang bae
sampe di rumah pa dia pe tamang dia cuma lia ada anjing di rumah itu
maar dia pe tamang so bilang kalo sampe di rumah kalo cuma ada anjing,
tanya jo pa tu anjing, dia tau mo jawab. Itu anjing pande skali.........

Oom Pedi : Oom ada di mana dang?

anjing : gong gong gong gong......

Oom Pedi : kalo bagitu, tanta mana dang?

anjing : gong gong gong gong

Oom Pedi :tanta dang deng om ada beking apa?

anjing : hach hach hach hach hach hach hach (anjing pe lidah sampe ta kaluar panjang2)

Humor Manado: Oma vs Sopir

Oma Mien ada nae mikro mo pi pasar. Biaso toh, sopir-sopir Mikro ja baku lawang stel musik keras-keras. So saki talinga, kong Oma tegor...

Oma: BOLE SE KACIL STOU TU TEIP...Oma pe jantong so mo ciri da dengar itu...

Sopir: Do do eee...KIAPA? OMA PE TEIP SO?

Lantaran tu sopir so bilang bagitu, Oma so nimau baku ambe kong so babadiam...So sampe di tujuan, pas ni Oma turun, Oma cuma ada kase 500 pa sopir kong iko bajalang...Karena kurang tu frag, kong ni sopir bataria mo minta pa Oma...

Sopir: OMAAAA, KURANG TU FRAG...cumang 500 ini Oma da kase...

Oma (deng mata so manyala, manyao): KIAPA? NGANA PE DOI SO?

Humor Manado: Ungke deng dua bule

Ungke deng Uti ada nae kapal Kambuna dari Manado mo pigi Jakarta...Ditenga laut, Ungke ada lia dua turis ada minum-minum bir...Blum abis tu 1 botol ni satu bule iko lempar ka laut tu botol...

Ungke: Meneer, belum abis kyapa so buang tu Bir?

Bule 1: No problem, bir banyak di Belanda...

Ungke pe dalam hati, sombong sekali ngana bule...Kong ni bule pe tamang le, blum abis minum tu bir itam, dia iko buang lei tu botol...

Ungke: Meneer, kyapa so buang belum abis?

Bule 2: No problem, bir hitam banyak di Inggris...

Bagitu ni bule Inggris abis bicara, Ungke iko angka pa Uti kong lempar ka laut...Ta kage kwa ni dua bule...

Bule: Why man? Kenapa buang itu orang ke laut?

Ungke (dengan penuh kemenangan): No prablem, kalu cuma Uti, banya di pasar 45...

Humor Manado: Pongo

Albert ada dudu ba tunggu bus di Jakarta. Kong tu orang sabalah pa dia batanya....

Utu: Boss, asli mana?

Albert: Saya asli manado...

Utu: Ooo sama kote torang...fam apa ngana?

Albert: Pongo...

Utu: Pongo? Pongo dari ...?

Albert: Kita Pongo dari kacili boss...

Humor Manado: Ciri di gigi

Alo ada iko test AKABRI, dia pe cita-cita memang dari dulu mo maso tentara. Ini so kali ke-tiga dia iko test maso..

Dokter: Alo, kita tau ngana ini so berjuang mo maso AKABRI, maar ada satu hal kwa yang nda maso kualifikasi...

Alo (sadiki kage): Kiapa Dok? bilang jo...so tiap taon komang kita da iko ni tes selalu gagal, maar kita nintau kiapa kita gagal...

Dokter: Iyo, ngana kwa dah ciri di kesehatan...

Alo: Ooo so nda butul komang itu Dok, pe sehat kita, nda baroko, nda baminum...Kong mo ciri dmana kita di kesehatan Dok?

Dokter: Ngana ciri di gigi, banya sekali lubang pa ngana pe gigi kong so ada beberapa gigi yang so nda ada...

Alo masih nda terima dia ciri di gigi, dia berjuang terus baku ambe deng ni Dokter, so latihan keras lei dia masa cuma mo ciri di gigi. Dokter terus berusaha menjelaskan depe penting punya gigi bagus, nda lubang2 kalau mo jadi tentara pa Alo...So amper satu jam dong baku ambe...akhirnya Utu menyerah...

Alo: Dok, kita kwa bingo ini, torang pe tentara itu mo baku perang ato mo BAKU GIGI?

Humor Manado: Pancing Ikan

Tiap hari sabtu pagi, Utu deng Alo ada pi ba pancing ikang di pinggir boulevard. Maar hari ini Utu pe muka rupa nda sedap, da bakalae stou dirumah. Kong Alo angka cirita biar nda baku badiam dorang da bapancing...

Alo: Utu...ngana tau, kita kalo bapancing, baru seturun tu umpan, ikang so langsung barempot akang, dong bakurebe mo makang ta pe umpan...

Utu: Oo iyo...(rupa nda parduli)

Alo: Mujisat itu...

Utu: iyo...(tekeng stau, rupa nda badengar)

Alo: Ngana dang?

Utu: Kalo kita baru ja pasang tu umpan...tu ikang2 so ja batanya 'UTU, umpan apa dang kita mo makang hari ini?'

Humor Manado: Keluarga Korban Mo Lewat

Cerita dibawah ini diambil dari wall facebook SMOKOL.com, ditulis oleh Cinta Wuisan.


Oom Allo dari Manado mo ke Kauditan pas di Sukur dia lia ada kerumunan orang banyak di pinggir jalan. Dasar Oom Allo sok tau, dia brenti kong ba tanya...

Oom Allo : hei Kalo ada apa itu?

Kalo : oh itu ada yang ta tabrak

saking penasaran mo balia Oom Allo cari-cari akal akhirnya Allo deng susah payah terobos tu kerumunan kong dia bataria...

Oom Allo : permisi-permisi keluarga korban mo lewat..

Orang-orang kase jalan dan ternyata begitu sampe....Ya kasiang Oom Allo pe keluarga yg tatabrak itu....BABI

Humor Manado: Nonton Rambo

Ini kwa cerita lama, jaman taon 80an. Belum ada stou 21, baru ada bioskop-bioskop biasa.

Utu ada pigi bauni filem, filem Rambo di President, dekat pasar 45. So rapi dia, pake baju gagah deng so pake perfyum lei dia.

Didalam bioskop memang rame, soalnya malam minggu ini, jadi banya orang datang bauni.

Filem so mulai, banyak bertempur deng bakalae, depe cerita kwa ni Rambo ada lari pi di hutang karena polisi-polisi da dusu. Top sekali dang tembak-tembak deng bakalae.

Utu setiap ni Rambo untung, dia ja sadiki bataria...
"Ooo lawang kwa tu Rambo",
"Kacang-kacang ngoni, Rambo mo se abis pa ngoni",
"barol kwa ngoni mo lawang"

amper sepanjang film kwa Utu bakomentar...

Sampe satu adegan, ada ni musuh badekat dari belakang so siap-siap mo tembak pa Rambo. Oooo Utu so tako sekali ni Rambo mo ta kana. So tegang, kage Utu bataria, kuat sekali..."RAMBOOO, ADA MUSUH PA NGANA PE BELAKANG!!"

Dan kebetulan, Rambo babale, lia tu musuh kong Rambo da tembak lebe dulu.

Puas sekali kong Utu bataria "TELE RAMBO, KALO NYANDA KITA SO MATI NGANA..."